Netsvik

Mikilvægt er að lesa og skoða skilaboð og tölvupósta mjög vel. Mikið er um að sendir séu tölvupóstar eða SMS sem líta út fyrir að koma frá t.d. bönkum, flutningsfyrirtækjum eða streymisveitum. Á bak við hlekkin er síðan fölsk síða sem lítur út fyrir að vera vefsíða viðkomandi fyrirtækis en er í raun svikasíða.

• Aldrei gefa upp persónuupplýsingar, eins og rafræn skilríki, notandanafn, lykilorð eða merki reikninga í gegnum síma
• Ef þig grunar að um svikasímtal sé að ræða þá er gott að halda upp á númerið sem hringt er úr, biðja viðkomandi að gera grein fyrir sér, spyrja hvernig viðkomandi hafi fengið númerið þitt og upplýsingar um reikningana þína, biðja aðilann að hringja aftur ef hljóðgæði eru lítil. Skelltu bara á ef þér líst ekki á símtalið, það er allt í góðu
• Lestu vel lénið (netslóðina) í skilaboðunum
• Ekki samþykkja innskráningu eða staðfesta aðgerðir með rafrænum skilríkjum nema þú sért 100% viss um að þú sért að skrá þig inn
• Ekki falla fyrir fölskum leikjum á samfélagsmiðlum, s.s. á Instagram, Facebook o.frv. Þú gætir fengið skilaboð (t.d. á Messenger) um að þú hafir „unnið“ og síðan er óskað eftir kortaupplýsingum til að hægt sé að leggja „vinninginn“ inn á kortið
• Passaðu þig á tilboðum um ýmis konar „fjárfestingartækifæri“ þar sem lofað er skjótum og öruggum gróða
• Aldrei senda frá þér kortaupplýsingar eða mynd af greiðslukortum þó þú þekkir viðtakandann
• Aldrei leyfa ókunnugum að taka yfir tölvuna þína eða snjalltæki með forritum á borð við AnyDesk, Teamviewer og Iperius Remote. Það er þekkt aðferð hjá svikurum.
• Aldrei deila notandanafni, lykilorð eða PIN númeri
• Ekki leyfa öðrum að nota heimabankann þinn
• Skráðu þig alltaf úr netbankanum við lok notkunar
• Lestu SMS um staðfestingu á netgreiðslum vel og vandlega
• Kauptu vörur hjá traustum netverslunum og vertu viss um að greiðslugáttin sé „Verified by Visa“
• Sparisjóðurinn gefur út VISA kort. Þegar Visa-kortið er notað í netverslunum þá er algengt að fá beiðni um rafræn skilríki (e. 3DSecure). Vertu viss um að beiðnin sé á þínum vegum

Hér að neðan má sjá helstu tegundir netsvika, hvernig hægt er að þekkja þau og verjast þeim. Það er um að gera að deila þessum upplýsingum með ættingjum eða vinum sem þú telur að hefðu gagn af fræðslu um þessi mál.

Vefveiðar (e. Phising)

Vefveiðar eru algengasta form netárása. Ásamt gífurlegum vexti í vefveiðum á hverju ári hafa þær einnig orðið mun fágaðri en áður. Það er greinilegt að mun meiri vinna er lögð í margar af vefveiðaherferðunum og geta þær litið mjög raunverulega út.

Gjafaleikir eru oft notaðir í vefveiðum og er fólk þá beðið að taka þátt í leik á samfélagsmiðlum og skilja eftir athugasemd við færslu. Fölsk Facebook síða svarar síðan athugasemd þátttakanda og tilkynnir honum að hann hafi unnið vinning og reynir að blekkja hann til að gefa upp kortaupplýsingar.

SMS veiðar (e. Smishing)

„Smishing“ er form vefveiða þar sem glæpamenn senda út svikul skilaboð í formi SMS skilaboða. Þetta er algengt form netárása á Íslandi og oftast í því formi að segja að pakki (t.d frá DHL eða UPS) sé kominn til móttakanda og tengill á síðu þar sem þarf að skrá kortaupplýsingar til að greiða „smá“ gjald en þessar upplýsingar eru síðan notaðar til að ná út fjárhæðum af kortinu.

Svikasímtöl (e. Vishing)

Dæmi um svikasímtöl er að hringt er úr símanúmerum sem látin eru líkjast númerum íslenskra banka og greiðslufyrirtækja. Sá sem hringir talar oft ensku og segist vinna í fjarvinnu til að gefa skýringu á því. Aðilinn getur verið mjög sannfærandi en hann reynir að lokka fórnarlömb til að innskrá sig í heimabanka með rafrænum skilríkjum. Þegar innskráningin er leyfð er nær samstundis reynt að svíkja út fjármuni.

Fjárfestasvik (e. Investment Fraud)

Þau felast til dæmis í skilaboðum, tölvupósti, færslu á samfélagsmiðlum, auglýsingum á netinu eða öðru slíku, gjarnan með upplýsingum um hvernig þú getir grætt með því að nýta þér „besta tækifæri ársins“ til kaupa á rafmynt, hlutabréfum eða öðru.

Fyrirmælafalsanir (e. CEO Fraud)

Dæmi um fyrirmælafalsanir eru svikahrappar sem falsa tölvupósta og senda á starfsfólk fyrirtækja, oft í nafni stjórnenda. Pósturinn er oft á tíðum mjög trúverðugur en þá er viðtakandi beðinn að framkvæma greiðslu á reikning sem þrjóturinn hefur yfir að ráða.

Keðjan er ekki sterkari en veikasti hlekkurinn og lykilorð gott dæmi um hlekk sem er oft ekki nógu sterkur. Sífellt fleiri vefsíður vilja að maður skrái sig inn með lykilorði.

Hafðu samband við okkur sem fyrst í síma eða með því að senda okkur tölvupóst.